1- ديمون سولز
وهل تعلم ماهي الصعوبة الحقيقية في زعماء ديمون سولز؟
بأن دربك للزعيم سيكون درباً مليئاً بالتحديات وسيستغرقك الوصول إلى نقطة الحفظ (البونفاير) وقتاً طويلاً, ولكن عندما نتحدث عن الجرافيكس في النسخة الحصرية للسوني 5 فلن نقول سوى بأن الرسومات والتفاصيل في هذا العالم تحفة فنية.
ومن بعد صدور ديمون سولز بدأت الصعوبة الحقيقية لألعاب السولز بالظهور. 
وسوف ترون هذا الشئ مع لعبة دارك سولز١
لانه هاللعبة ماخذة نفس طابع ديمون سولز في انك اذا مت راح تطق درب على ما توصل للزعيم
ولكن في هذا الجزء تطور ملحوظ في الزعماء والأعداء وتنوع اكبر بالبيئات ومع هذا كله ما ختمت اللعبة لاني مو قادر اوقف اقارن تجربتي معاها ومع دارك سولز٣ وبلودبورن للأسف وما حسيت انه دارك سولز١ فيها شئ يميزها مختلف عن دارك سولز لأنه دارك سولز ٣ بكل بساطة خذت افضل مافي السولز وعطتك اياها فمن جذي صعب اتقبل العاب السولز القديمة مثل ديمون سولز ودارك سولز ١
وما لعبت دارك سولز ٢ ولا راح العبها، ليش ؟ لا تسألوني بس شكلها مو حلو صراحة ووايد كلام سلبي عليها
بدايتي الفعلية لألعاب السولز كانت مع التحفة الفنية بلودبورن
مع انه لما شريتها مع صاحبي اول مرة تخيلوا انه بعدها يومين رجعنا المحل بعناها
وشنو تتوقعون كان السبب؟ حيل صعبة
وبعد اشهر من بيعها قاعد اسمع كلام ايجابي واشوف تقاييم عالية عليها فكنت افكر بيني وبين نفسي ليش الناس تحب هاللعبة؟ شنو الحلو فيها اصلا؟ ما تستاهل كل هالضجة
فقررت اشتريها مرة ثانية يمكن اكون ظالمها !
وطلعت صج ظالمها لاني لما تكيفت مع جو اللعبة ما قدرت اتركها الا لما ختمتها
ومن بعدها مافي لعبة سولز لايك الا شريتها
من كاره هالنوع من الالعاب الى عاشق
والشئ المميز في بلودبورن





وبعدها انتقلت الى دارك سولز ٣ علطول
كانت من احلى التجارب لاني تعمقت في عالمها وحاولت اطلع اكل الخواتم وختمتها ٤ مرات
واستمتعت بطور pvp
وفي تنوع بالأسلحة بشكل كبير
كل سلاح له جوه الخاص وكل ما تقتل زعيم يعطونك اما سلاح او درع يكون اما سلاح الزعيم او درعه وهذا النظام اللي اعتمدوه مع كل العابهم التالية
انا شخص استمتع بالمواجهات على المدى القريب وما استعمل درع
هذا اللي خلاني استمتع بدارك سولز ٣ لانه على عكس الجزء الاول وديمون سولز اللعب جدا سريع
قريب من السرعة في بلودبورن
والجرافكس حلو وفيه الوان ساطعة على عكس الالعاب السابقة
والنقطة الجوهرية في هذا الجزء انه الصعوبة متوازنة مو غبية مثل ديمون سولز انه يخلونك تطق درب ١٥ دقيقة على ما توصل للزعيم
ولا صعوبة مبالغ فيها لدرجة انهم يحشرونك في غرفة صغيرة كأنك فار
تعلموا من تجاربهم وعطوك افضل ما عندهم في دارك سولز٣ وبلودبورن
بعدها قرروا انه يغيرون نمط اللعب يبون يخاطرون ويطورون لعبة مختلفة عن العابهم
وطبعا قالوا خلونا نزيد الصعوبة
تكون مختلفة بس ماخذة عناصر السولز لايك واللي اهي سيكيرو شادو داي توايس
لا جد ما كانوا يضحكون في فرق كبير بين سيكيرو وبلودبورن
اللي كنت تطبقه يا الحبيب في دارك سولز وبلودبورن مرح تقدر تطبقه مع سيكيرو
لأنه اللعبة مافيها dodge ولا stamina فيها شئ يديد واللي اهو parry و counter
اللعبة ما ترحمك بالبداية لانه تبدي معاك صعبة حيل وتصير اسهل مع الوقت
وعندك سلاح واحد طول اللعبة وعندك عداد حق نظام parry فاذا كنت تصد الاعداء والزعماء بس صدك مو مثالي راح يرتفع العداد الى ان ينكسر دفاعك وراح تصير عرضة للهجوم واذا كنت تصد صد مثالي فمكافئتك انه العداد راح يظل ثابت

واللعبة من ناحية التصدي جدا ممتازة لأنه الوقت بين كل تصدي ١٢ اطار ولكن اذا كنت تسوي spam راح تقل عدد الاطارات
فيا الحبيب اذا كنت تسوي سبام راح تزعلك هاللعبة صدقني
تنوع الزعماء فيها شئ عجيب كل زعيم راح يخليك تتعلم شئ ومن قوة الذكاء الاصطناعي اللي فيهم تحس انك قاعد تباري شخص حقيقي مو كمبيوتر
الحركة جدا سريعة باللعبة وعندك القرابلنق هوك يخليك تقدر تتسلق اماكن عالية وتتنقل بين الاماكن بسرعة
وصح انه ما عندك غير سلاح واحد بس عندك يد اصطناعية تعطيك معدات مختلفة
تعطيك تنوع في الطريقة اللي تواجه فيها الزعماء وتستغل هاليد في نقاط ضعف الاعداء
واربحت جائزة لعبة السنة فيا الحبيب اذا ما لعبتها لحد الحين شنو اموقفك؟ راح تعطيك تجربة مرح تتكرر صدقني
وعندكم لعبة nioh
لعبة استمتعت فيها ولها جو الأنمي البعيد عن السوداوية وقدمت ثلاث وضعيات stances لكل سلاح
كل واحد منهم له طريقة مختلفة وفي باللعبة ٧ انواع مختلفة من الأسلحة فمعناته عندك قريب ٢٢ طريقة وستايل في مواجهتك للأعداء فأقدر اقولكم بكل بساطة إنها افضل لعبة من نوع السولز لايك مو من فرومسوفتوير اللي قدمت تنوع كبير بالأسلحة
والزعماء الاساسيين في اللعبة جدا صعبين وعندك زعماء جانبيين في كل مكان تلقاهم
بس التنوع في البيئات سئ
تحس البيئات كلها ماخذة نفس الطابع
بس اللي يغثني باللعبة انه فيها نظام تلفيل فاذا بتروح مرحلة لفلك عالي راح تصير سهلة
واذا لفلك اقل من المستوى المطلوب راح تنجلد واذا بترفع لفلك لازم تخلص المراحلة الجانبية وصراحة المراحل مملة نسخ لصق من اجزاء من المراحل الاساسية
ونفس الشئ ينطبق على nioh 2 طبعا تحسنت بكل شئ وقدمت قدرة تخليك تتحول الى الزعيم اللي قتلته فيا انه اللعبة فيها تنوع كبير بكل شئ بس صعوبتها مبالغ فيها بصراحة ونظام الفلل ما حبيته احس انهم غاصبيني العب المراحل الجانبية علشان الفل
بس بكل صراحة اللعبة ممتعة حيل والبيئات وايد احسن من الجزء الاول بس اللعبة طويلة راح تاخذ منك قريب ٤٥ ساعة علشان تختمها goodluck
وفي عندك wolong fallen dynast نسخ لصق من nioh طبعا شنو متوقع انا نفس الشركة اللي مطورة nioh
وفي عندك rise of the ronin نسخ لصق من nioh بس هالمرة من نفس الشركة
ليش العب العاب نسخ لصق وما قدمت شئ يديد مثل هاللعبتين
Lies of p
الأسطورة من الاستوديو الكوري round8 studio
اللي قامت بإعادة رواية قصة الأطفال وحولتها الى قصة سوداوية وكل ما يجذب بيونكو اكثر كل ما يصير انسان اكثر واذا قال الحقيقة فمعناته انه الشخصية اقرب لكونه دمية هدفه اهو البحث عن الشخص اللي اصنعه واللي اسمه جيبوتو ومن بعدها تبأ الاحداث
اللعبة معتمدة بشكل اساسي على parry وعلى عكس سيكيرو اللي كانت الوقت بين كل تصدي ١٢ اطار lies of p تقول لا يا حبيبي نبي لعبتنا تكون اصعب فخلونا نخلي الوقت بين كل تصدي ٨ اطارات
وقالوا هذا مو كافي نبي نخليها اصعب فأذا مو قاعد تسوي perfect guard راح تتدمج.
امممم فلازم تحسب حسابك عدل في مرة تضغط زر التصدي
وجو اللعبة والنمط الفني اللي فيها حلو ومختلف عن باقي الالعاب لانك عايش في مدينة krat الغامض اللي راح تبحث فيه وتعرف القصة اكثر
افضل لعبة من السولز لايك مو من فروم سوفتوير تعطي جو الغموض وتثير فضولك
التنوع في الأسلحة مو كبير وسط بس شعور الضرب بالأسلحة ويدة dualsense ما قصرت صراحة في الإستجابة خلتني اعيش جو
تصميم المراحل بسيط ومو معقد والزعماء كلهم ممتازين بلا منازع على عكس باقي العاب السولز هاللعبة مهتمين بالزعماء الأساسيين وكلهم راح يعطونك تجربة حلوة
واذا مت عند الزعيم فراح تقدر انك تاخذ فلوسك خارج المكان اللي راح فيه الزعيم وصراحة شكرا على هالشئ
بس الزعماء الجانبيين حيل ضعاف ومو صعبين
وعندكم نفس نظام اليد الاصطناعية اللي بسيكيرو تعطيكم قدرات مثل نار وكهرباء وتقدرون منها تستغلون نقاط ضعف الزعماء

وآخر لعبة راح اتكلم عنها واللي اهي Elden ring اللعبة ممتعة وكملت على نفس نهج السولز اللي متعودين عليه بس هالمرة تقدر تنقز وبعالم مفتوح
مشكلتي الاساسية باللعبة اهي تكرار الأعداء و الممك تير
لأنه صراحة عامل الصعوبة قل حيل
لانه مع تكرار الاعداء تقدر تلفل بسرعة وتروح عند الزعماء الاساسيين وتجلدهم جلد الا وحدة منهم اللي لو تلفل لي باجر مرح تقدر عليها ميلينيا والرئيس بداية اللعبة مارقت
اما الرؤساء الباقي فجلدتهم لأنه لفلي عالي وقاعد اكتشف العالم
ما بصير تعاقبوني اني قاعد اواجه الزعماء الجانبية بأنه الزعماء الأساسيين يكونون سهلين
بس المتعة في اكتشاف العالم موجودة وهذا اهم شئ واضافة الحصان اتوقع ما ادري شنو اهو صراحة كانت خوش اضافة صار التنقل سريع وتقدر تقاتل وانت عليه
الزعماء الأساسيين منوعين وكل واحد منهم مميز والزعماء السريين ممتازين وتسوى انك تبحث عنهم لأنهم راح يعطونك تجربة حلوة
العالم كبير حيل صراحة وراح تاخذ منك اللعبة عشان تكتشف كل شئ فيها قريب ١٣٠ ساعة ومع كل هذا هالشئ ما اثر بالسلب عليها بس جزئية التكرار
والإضافة حلوة بس ما تستاهل سعر ٤٠ دولار مع احترامي الشديد
عندي مشكلة مع هالاضافة انه العالم فاضي ورؤساء الدنجن فيه تكرار بعد
وآخر بوس radahm صعب حيل والعدو الناري مافي متعة بقتاله
وباقي الأشياء من اسلحة واضافة blessing اللي تخلي اللعبة اصعب كانت اضافة حلوة حلت مشكلة السهولة في اللعبة الاساسية